ఆడ దోమలు మాత్రమే రక్తం ఎందుకు పీలుస్తాయి? ఈ ఆసక్తికర విషయాలు తెలుసా?

ఆడ దోమలు మాత్రమే రక్తం ఎందుకు పీలుస్తాయి? ఈ ఆసక్తికర విషయాలు తెలుసా?
దోమలు తమ ఆకలి తీర్చుకోవడానికి మన రక్తాన్ని పీల్చవని మీకు తెలుసా?
ముఖ్యంగా మగ దోమలు రక్తాన్ని పీల్చవు. కేవలం ఆడ దోమలే రక్తాన్ని తీసుకుంటాయి.
అసలు ఆడ దోమలకు మన రక్తం ఎందుకు అవసరమో తెలుసా?
ఆడ దోమలు మాత్రమే రక్తం ఎందుకు పీలుస్తాయి? ఈ ఆసక్తికర విషయాలు తెలుసా?
వర్షాకాలంలో దోమల బెడద పెరుగుతుంది. దోమ కుట్టిన చోట దురద, మంట, వాపు వంటి సమస్యలు వస్తుంటాయి. అయితే దోమలు అసలు మనుషులు, జంతువుల రక్తాన్ని ఎందుకు పీలుస్తాయో ఎప్పుడైనా ఆలోచించారా? ఆశ్చర్యకరమైన విషయం ఏమిటంటే.. అన్ని దోమలు రక్తం పీల్చవు. అంతేకాదు, రక్తం వాటికి ప్రధాన ఆహారం కూడా కాదు.
ఆడ దోమలే రక్తం ఎందుకు పీలుస్తాయి?
సాధారణంగా ఆడ దోమలు మాత్రమే మనుషులు, జంతువుల రక్తాన్ని పీలుస్తాయి. మగ దోమలు రక్తాన్ని పీల్చవు. మగ, ఆడ దోమలు రెండూ పూల మకరందం, మొక్కల రసంలోని చక్కెరలను తీసుకుని శక్తిని పొందుతాయి. అయితే ఆడ దోమలు ప్రధానంగా గుడ్లు పెట్టేందుకు, వాటిని అభివృద్ధి చేయడానికి అదనపు పోషకాలు అవసరం. రక్తంలో ఉండే ప్రొటీన్లు, ఇతర పోషకాలు గుడ్ల అభివృద్ధికి ఉపయోగపడతాయి. అందుకే ఆడ దోమలు మాత్రమే మనుషులు, జంతువులను కుడతాయి. రక్తం ద్వారా అవసరమైన పోషకాలను పొందిన తర్వాత గుడ్లను పెట్టేందుకు అనువైన ప్రదేశాన్ని వెతుక్కుంటాయి.
దోమలు మనుషులను ఎలా గుర్తిస్తాయి?
దోమలు మనుషులతో పాటు పక్షులు, ఇతర జంతువులను కూడా కుట్టగలవు. ఆహారం కోసం వాటిని గుర్తించడానికి పలు సంకేతాలను ఉపయోగిస్తాయి. మన శరీరం నుంచి వెలువడే కార్బన్‌ డయాక్సైడ్‌, శరీర వేడి, చర్మం నుంచి వచ్చే వాసనలు దోమలకు మన ఉనికిని గుర్తించడంలో సహాయపడతాయి. ముఖ్యంగా మనం శ్వాస తీసుకునేటప్పుడు విడుదల చేసే కార్బన్‌ డయాక్సైడ్‌ దోమలను ఆకర్షించే సంకేతాల్లో ఒకటి.
దోమ కుట్టిన చోట దురద ఎందుకు వస్తుంది?
ఆడ దోమ రక్తాన్ని పీల్చే సమయంలో చర్మంలోకి కొంత లాలాజలాన్ని విడుదల చేస్తుంది. ఈ లాలాజలంలోని పదార్థాలు రక్తం గడ్డకట్టకుండా, దోమ సులభంగా రక్తాన్ని పీల్చుకునేలా సహాయపడతాయి. మన శరీరంలోని రోగనిరోధక వ్యవస్థ ఈ లాలాజలానికి ప్రతిస్పందిస్తుంది. దాంతో దోమ కుట్టిన చోట ఎర్రగా మారడం, దురద, వాపు వంటి లక్షణాలు కనిపిస్తాయి.
అన్ని దోమలు వ్యాధులను వ్యాపింపజేస్తాయా?
అన్ని దోమలు వ్యాధులను వ్యాపింపజేయవు. అయితే కొన్ని జాతుల దోమలు మనుషులకు ప్రమాదకరమైన వ్యాధులకు కారణమయ్యే సూక్ష్మజీవులను వ్యాప్తి చేయగలవు. దోమల ద్వారా వ్యాపించే ముఖ్యమైన వ్యాధుల్లో డెంగ్యూ, మలేరియా, చికున్‌గున్యా ఉన్నాయి. అందుకే ఇంటి పరిసరాల్లో నీరు నిల్వ ఉండకుండా చూసుకోవడం, దోమతెరలు లేదా దోమల నివారణ చర్యలు తీసుకోవడం ముఖ్యం.